السبت، 30 أبريل، 2011

هذه حالة بذمتك ..؟!




مابي أخلي موضوعي مآساوي ..

بس وأنا قاعدة أسمع اغنية ( هاذي حالة بذمتك ؟!)

تذكرت .. وتوجعت .. قلت ليش ما اكتب خواطري هني مع اني ترددت..

من قبل جم اسبوع رحت حفل تخرج اختي بالجامعة ..

ورجعت على الذكريات كنت في نفس هالمكان قبل ثلاث سنين ..

شنو اللي تغير ؟1

كنت وحيدة ..قبل ثلاث سنين ..

ادور على رفيجة أضمها .. واحضنها ونشارك افراحنا مع بعض

مالقيت

دورت بين وجوه الناس الحاضرين على وجوه عائلتي واسرتي

مالقيت

دورت على ايد الحبيب .. يبارك لي في أسعد لحظات عمري

مالقيت

بعد ثلاث سنين شنو اللي تغير ؟!

ولا شي

الحال هو نفس الحال

الانجاز والاحلام والطموحات ..

ما تتحقق منها شي

هي نفسها نفسها مركونة على الرف .. ترسها الغبار الزايد هاليومين

اظل متفائلة ..

مثل المطر اللي يغسل الغبار

يمكن ربي يرزقني هالمطر في حياتي ؟!

يغسل همومي ومعاناتي وآلامي ..

يمكن بعد فترة .. وبعد سنوات ..

اقرى هالخاطرة واضحك عليها واقول انه كل شي تغير وصار كل اللي اتمناه ..!!


يمكن ..؟!



الثلاثاء، 26 أبريل، 2011

لعبة الصراحة في مطعم ناز الايراني !!

السلامـ عليكمـ ورحمة الله وبركاته

بعد ماسويت مشاوير مع  اخواتي .. وحدة منهم صكها اليووووع ..

بطريجنا الجابرية واقرب مطعم كان مطعم ناز الايراني

المطعم موجود في جمعية الجابرية  نسمع عنه بس أول مرى نجربه

عالعموم ..

دخلنا وصعدنا بالأصنصير وصلنا المطعم

حدددده هادي وحلو والخدمة سريعة جدا

القائمة متنوعة

بس ما كثرنا

طلبنا بطاط مقلي ومشكل مشويات والطلب يجي معاه عيش بنكهات مختلفة 

وطلبنا شاي  وسبرايت وهالسوالف ..

يا زين الخبز الايراني واهو حاااااار - الله على الطعم  *_^

طبعا السعر رمزي جدا جدا

تقييمي للمطعم  حلو بس مو واو طبعا ، يعني يصلح حق شي سريع على الماشي..


طبعا ..


الشي اللي صار بقعدتنا .. انه اختنا اللي طايحة من اليوع اقترحت لعبة الصراحة ؟

يعني أسئلة نوجهها لبعض لكن بشرط انجاوب عليها بصراحة ..!!


راح اقول لكم الأسئلة يمكن تلعبونها مع ربعكم او اهلكم ..

الأسئلة حدها صريحة وقوية والميزة

يمكن اتعرف عن اللي جدامك اشياء ما كنت اتعرفها

@_@


من الأسئلة اللي قلناها في اللعبة ..

1- شنو الشي  سويته وندمت عليه ؟

2- لو بايديك اترد الزمن لورى شنو الشي اللي تبي تعدله او تغيره؟

3-في شخص ودك تقوله ( آآآسف على اللي سويته بحقك) ؟

4- اتفكر بالزواج ؟

5- شنو اشد امنية تتمناها الحين ؟

6- شخص توفى - لو كان الحين واقف جدامك شنو راح تقوله على طول ؟





يلا قراء مدونتي اوجه لكم هذه الأسئلة السابقة وجاوبوا عليها

بصراحة شديدة

قدها ولا ؟


والآن اخليكم مع صور المطعم










الجمعة، 22 أبريل، 2011

عطور حلال فيها الفلوس *_^




السلامـ عليكمـ

كيف الحــال ؟

آآآآخر مشترياتي من العطور ..













عطر hypnotic dior  الجديدة

كل ما اروح مكان .. الكل يسألني عنه .. ؟!
شنو حاطة وشنو حاطة ؟؟
العطر يتميز رائحة قوية قوية قوية  وثابته ..












عطر roberto cavalli 

 العطر منعش وخفيف للصيف
اتحسون بانتعاش مو طبيعي
وثاااابت على الملابس لساعاااااات













عطر la prairie perfume rain 

منعش منعش منعش على الصبح ..
اذا انتي رايحة مشوار خفيف وسريع
رشي منه راح يغير نفسيتج

















مع أمنياتي لكم بأيام معطـــرة وسعيدة

بانتظار تعليقاتكم الطيبة

*_^


الأربعاء، 20 أبريل، 2011

هالمرة هبة MAC وبس ..!!

السلامـ عليكمـ

ديرتي الكويت .. معروفين بالموضة والهبات والطلعات ..!!





آآآآخر سنتين هبة MAC طغت على الديرة

وصارت شغلنا الشاغل ..

لدرجة انه اول مانزلت المنحة الأميرية الكل فكر بشراء منتجات ماك

يتروالي لازم شركة MAC تسوي احصائية خاصة بدولة الكويت
وتعرف الشركة جم اربحوا منا هالسنة بالذاااات :)

منتجاتهم ماك صارت عند الكل ..

الصغير والكبير !!

الفاهم والجاهل ..!!


بس انا لهذه اللحظة مستغربة اشلون ( طفل) في الابتدائية يكون عنده أي باد ..؟!

شي عجيب .. غريب

الآي فون صار عند الكل ..ونغمته رنت في جميع البيوت
تهقون راح ينزل G5
???





الآي باد  الرفيق الحبيب من الصعب فراقه






والآي بود .. لابد من للأغاني والفيديوات والألعاب




آآآآه يا مــاك ..

شنو سويتي فينا ...؟!

الأحد، 17 أبريل، 2011

فضفضة ريجيم 7

السلام عليكم

يا جماعة انا زعلانة :/


 اتمنى مشارككتم في المواضيع الثانية في المدونة .. 
الله لا يحرمني من  تعليقاتكم الطيبة




عالعموم ...أقولكم آآآآخر اخباري عن الريجيم ..

آآآآه
كل شي يبيله صبر
كل شي يبيله عزيمة
الاحلام من الصعب تحقيقها


راجعت دكتور التغذية وبلغته عن مشكلتي وهو التساقط الرهيب في شعري ..

على الجتف وملابسي ومخدتي .. الحالة مــآآآآساة

عطاني كبسولات وانا أصلا عندي فوبيا من الحبوب

اي نعم :/ ادري راح تستغربون ؟؟؟؟


ما اعرف ابلع حبوب - آآخـــــــــــــااااااف منها

قالي الدكتور : اكسريها .. وذوبيها بالماي واشربيها ..!!


هذه صورة لحبوبي شريتها من صيدلية الشامية ..

ليما الحين ما خذيت منهم .. بس يقولون الفيتامينات تفتح الشهية صج ؟

واذا فيه نتايج زينة من هالكبسولات اكيد راح أبلغكم









حبيت اتعالج ايضا من الناحية الشعبية

وهي خلطات الشعر ..

خلطة الصبار مع الثوم


اول شي الثوم تحطونه على قشرة الراس
+ بعدين عصر اوراق الصبار ووضعها على قشرة الرأس 
 + بعدين ندهن شعرنا بالزيت او الماسك

انا الصراحة مالي مقاقة للخرابيط هاذي .. رحت الصالون وسووا حقي هالخلطة ..


والله !!

عجيب الخلطة تعطي لمعة حلوة للشعر وتنظف وتقوي الشعر
 بس المشكلة السعر غالي على جلسة واحدة
علشان جذي اذا تقدرون اتسوونه في البيت احسن لكم وأوفر



وانتهت فضفضتي ..بانتظار تعليقاتكم








...

الجمعة، 15 أبريل، 2011

THE BEST FLICKER EVER

السلامـ عليكمـ

الصراحة .. اذا حسيت انه صكت فيني الغلقة ..
وابي استانس وارفه عن نفسي اشوي

سيدة اروح اتصفح هالفلكر للمصورة أفنان سليمان

طبعا الكل يعرف موقع فلكر هو موقع متخصص لتحميل الصور + الفيديوات اغلب الحسابات في الموقع مجانية لكن طبعا اذا تبون مساحة اكبر مع مميزات اكثر تكون غير مجانية ..

 افنان سليمان  مصورة  مبدعة .. رائعة .. موهوبة ..
متميزة انا من أشد المعجبات و المتابعات لها


صورها متميزة جدا من حيث الالوان والزوايا والأفكار ...
الكلام اللي تكتبه كتعليق على الصورة معبر وحقيقي جدا
شي يحاكي المشاعر .. ويخليني اقول الآآآآه
احسها تفهم ما يجول بخواطر الناس ..

الله يحفظها :)

زوروا موقعها اللي أصبح عدد الزوار يفوق 30،000  زااااائر







NESCAFE .. مزااااااج

السلامـ عليكمـ

أحب النيسكافيه .. الصراحة إدمان ..

السبب الأول يصحصح ..

والسبب الثاني يخليني شبعانة لفترة طويلة ويتغلب على الجوع ويسد الشهية:)



الصراحة انا اسويه بمزاج

الموضوع بالنسبة لي مو ماي حار واقلبه وهالخرابيط لأ لأ لأ ..




المقادير كالتالي:

كوفي ميت + سكر سويت ان لو + نيسكافيه أسود + حليب ابوقوس + ماي حار






الخطوات

احط ثلاث قفاش من كوفي ميت + قفشة نيسكافيه ( القهوة سودة) + 2 سويت ان لو + اشوية حليب ابو قوس

بعدين اخلطهم بالقفشة حيييييييل

بعدين احط عليهم الماي الحار تطلعلي رغوة مثل رغوة الكابتشينو





وووووووواشرب مع الاستمتاع بالطعم وغالبا أكل مع النيسكافيه كاكاو او معمول تمر يعني اي شي حالي


جربوا ترى ما راح تندمون ..





الأربعاء، 13 أبريل، 2011

فيلم RIO

دعوة للانتعاش  .. للسعادة .. والضحك من القلب


فيلم RIO

الصراحة الفيلم عجيب .. مناسب للاعمار الكبيرة بس الاعمار الصغيرة في وايد قطات وكلمات ماراح يفهومونها بس اكيد رح يستانسون على الاغاني والرقص والايقاعات ...


الفيلم منعش جدا .. ويضحك .. ويوووونس


تدور قصة الفيلم عن ببغاء اسمه بلو على لونه ..
أصوله من منطقة ريو ( في البرازيل) وانه تم اصطياده ونقله الى منطقة منيسوتا وتربيه بنت ويصيرون ربع حيييييل .... فجأة يأتي عالم متخصص في الطيور يطلب من البنت صاحبة الببغاء بلو ....بضرورة التخلي عنه وانتقال الطائر الى بلاده الأصلية ريو لانه يعتبر آآخر طير في سلالته 
ولازم ينقذ فصيلته من الانقراض لابد ان يحدث  تزاوج 
 مع آآآآخر انثى موجودة في سلالته في ريو


وهنا تكمن المغااااامرة .. رحلة العودة الى ريو :)




لقطات ومشاهد وحورات مضحكة ... الموسيقى شي خيالي ..
وصوت المطربين رائع جدا وهاااااادي




مازال الفيلم موجود في السينما ... أتمنى لكم مشاهدة ممتعة





الثلاثاء، 12 أبريل، 2011

فضفضة ريجيم 6

قلبي .. قلبي وآآآآآآآآآه ياقلبي




أبشركم رجعت للانضباط والالتزام ..

مع انه للأسف اليوم كليت مافن كاكاو !!

بس أحسن من قبل - كنت مبدعة حيل الأسبوعين اللي فاتو

عالعموم :/

في مشاكل حاليا تواجهني ..


الامساك ..

ذابحني حيل وماني عارفة شسوي ؟

واللي اعرفه انه الامساك حيل يأثر على عملية انخفاض الوزن

يعني يخلي الوزن ماينزل بسرعة !!

+

تسااااقط الشعر


انا خايفة بعد ما أضعف .. انه اصلع !!

عندي تساقط رهيب .. وما ادري شنو تنصحوني فيه ؟!




الاثنين، 4 أبريل، 2011

فضفضة ريجيم 5



والله مو عاجبتني نفسي هالأيام

أحس نفسي  .. تقهقرت ..!!

حلوة هاذي ....تقهقرت؟

من دون هالكلمات .. نقيت هالكلمة .. يعني مثقفة ..!!

عالعموم ارجع لمحور حديثي ..

أحس اني مو نفس عزيمة قبل .. يمكن بسبب النفسية والضغوطات..

أبي ارد سنعة وانضباطية بالريجيم ...



مشكلتي اني هالفترة احس في لخبطة حسابات ..!!

يعني مثل الأوراق المتناثرة ..

ماعرف ايهو الصالح وايهو الطالح ؟
ايهو الحين وايهو بعدين ؟
ايهو اللي ينطر وايهو اللي عاجل ؟


متى ماقدرت ارتب اولياتي .. راح اقدر ارتب حياتي ..


أشكركم حيل على متابعة فضفضة ريجيم


ماتدرون اشقد تعليقاتكم (( مفيدة )) حيييييل بالنسبة لي




الأحد، 3 أبريل، 2011

آآآآآآه .. كنت أظن انج رفيقة الدرب ..!!

السلام عليكم :

والله متأثرة سلبيا بوحدة معاي بالدوامـ

كان ودي تكون بينا رفاجة .. واخوة

ويكون على قلب واحد

بس مع الأسف تصرفاتها .. خاصة اتجاهي .. شيبت راسي

ودي اعرف السبب ؟

ماتوقعت .. انها بهطريقة ..

كل يوم تصدمني فيها اكثر من قبل

اللي مطفرني اكثر انها شاغلة جزء من تفكيري

....

لدرجة اني متحسفة اخصص لها الجزء او حتى اخصص لها جزء في المدونة اتكلم عنها

.......

ما ادري هل انا غبية ؟
وما ادري شنو التصرف ؟