الخميس، 31 مارس، 2011

فضفضة ريجيم 4

قلت أبي اتمشى ؟

أبي أتحركـ ؟

أبي اطلع من الجمود الى الحياة ؟

ومن الكسل الى النشاط ؟

وكالعادة الحماس يضرب أرقامه القياسية عندي .. والادرينالين يشب ويزيد ..

وبدون أي شعور اراجع المراكز الرياضية وأسأل عن الأسعار ..


 ويقع الاختيار على مراكز الوسيط ..!!


لووول


عالعموم .. اقلب بالصفحات واطيح على ذاك الاعلان ..


افضل وصف .. افضل سعر .. اشيل هالتلفون وادق ..

وباكر يطق العامل الباب وبايده وعلى ظهره الجهاز





جهاز مشي وفيه 8 أجهزة ..

حلو وجديد ..... وتخيلوا يا الغوالي













على حطته .........................................!!!


مامشيت عليه .. مامشيت


العاصفة الترابية مرت وترسته فوق الغبار ... غبار




وسلامتكم ..

الأربعاء، 23 مارس، 2011

ملاذ الروح



كالعادة  الدوام .. صعب وتعب وكسرة ظهر .. ارجع البيت علشان آكل لقمة هنية وانام جم ساعة وارتاح

لكن وين الراحة في دنيا فانية ..!!

اسمع هالخبر المزعج ..  وقلبي يمتلكه الخوف والقهر ..... والدمعة ودي افرها من عيني بس وين أقدر ..؟!

بعد الغدا احاول امارس حياتي الطبيعية .. مانمت العصر ولاشفت الراحة

طلعت العصر علشان اخلص اشغالي ..

ولكن بالي مشغول والدنيا الوسيعة ضاااااقت علي


رديت البيت وكان فيه زوار ...  استقبلتهم والابتسامة اتشق الويه ..!!


(( مافيني شي .. والقلب جريح .. مافيني شي والفكر يرد ويروح .. مافيني شي والبال مشغول ))

بعد الساعة 7 بالليل .. حسيت بختنق :/




سيدة شبكت بالنت .. قام يعلق ومايفج نهائيا ......ولا حتى صفحة ..!!



حتى المدونة .. موقادرة اكتب فيها .. مو قادرة اطالع الكيبورد .. موقادرة اجمع افكاري !!


دقيت على اختي يمكن افضفض لها .. اللي فيني خوف وتعب والم محتاجة الى اي احد ..!!


دقيت عليها ردت وقالت : بدق عليج .. بعد اشوي أنا الحين طالعة



بغيت اشتكي لأي احد في البيت  ...!!

محد صوبي ، ، ،


قمت اطالع السقف .. واجابل تلفوني على امل انه احد يدق وافضفض ، واقول كل اللي في خاطري :/


آآآآآآآآآآآآآآآآآآآآآآآآآآآآه








فجأة ..

شي غريب ..

كأنه ضمير او صوت ثاني

كأنه همس في اذني  .. (( صلي ركعتين لله ))








فعلا .. رحت توضيت  .. ولبست لبس الصلاة وفردت السجادة وصليت في داري

بمجرد ماسجدت ,, بجيت وبجيت وبجيت

وقلت كل اللي في خاطري ودعيت

وقريت من القرآن وقريت


عرفت انه ربي .. الهي .. خالقي .. هو ملاذ الروح الوحيد


والله يبعد عنكم الهم والكدر ويحفظكم من المصايب .. ويجعل السعادة في كل يوم تعيشونه


وادعولي بالمثل



الخميس، 17 مارس، 2011

فضفضة ريجيم 3

السلامـــ عليكمــ






آآآآآه من الريجيم وسنينه ..!!

الصراحة  أحس بإنه الارادة حدددددها zero

للحظات ودي أرد نفس الأول ..  كل شي اشتهيته لطيته ..!!


وللحظات اقول .. اذا غلطت راح أبتدي من الأول ........وأنا مافيني أبتدي من الأول ....!!


اشلون بصبر ..؟

الريجيم يبيله صبر وطول بااااااال يبيله ارادة من حديد *_*

اشلون أعلم نفسي الصبر ...؟ اشلون اتحمل هالرجيم مدة طويلة ؟


فكرت انه لازم يكون عندي دافع قوي .. يعني غير الاهداف اللي في بالي

محتاجة نوع من التحدي .. محتاجة نوع من المنافسة ..


يعني شي اتذكره كلما حسيت اني بخربط بالريجيم يمنعني - نوع من المنبه القوي ( جرس تنبيه ذاتي ) كأنه ضمير ويؤنبني!!

ما ادري شنو هالشي ؟



الاثنين، 14 مارس، 2011

نصيحة من قلب محب .. جربوا لوكسيتان !!

السلامـ عليكمـ

كيف الحال ؟

خل أطلع من مود عواصف الريجيم ولو اني مبدعة هاليومين >> لحد يشوفك !!

الموقع - الأفنيوز

المحل : لوكسيتان


محل فرنسي .. جميع المنتجات فيه عضوية وطبيعية .. مضمونة 100%

أنصحكم وبشدة من تجربة منتجات هالمحل .. لأنه اذا ماجربتوا .. طافكم *_*


راح أتكلم عن تجربتي المتواضعة مع بعض المنتجات :)




جربت ديودرنت أعشاب الليمون -

هالديودرنت خالي من الكحول والألمنيوم الصراحة احس بجفاف ونظافة مو طبيعية غير انه يدوم 24 ساعة





جربت زيت اللوز - لدهن الجسم واليد والقدم - نعومة رائعة والبشرة تمتص الزيت بسرعة







مزيل مكياج العيون - المنتج الساحر قطرة وحدة على القطنة يشيل اقدعها ميك آب والميزة مالته انه غير ضار للعيون وماتحسس منه







ماسك الأرز الأحمر - يوازن الدهون في الوجه وينظفها جربته بس يبيله متابعة :)





كريم الشيا للقدم - آآآخ على الترطيب ، لايطوفكم :)










وهذه تجربتي مع "لوكسيتان "

 ان شاء الله اكون افدتكم


أتمنى لكم دوام الراحة والرخاء والسعادة ،،،

عندكم تعليقات حياكم يا الغوالي


الثلاثاء، 8 مارس، 2011

فضفضة ريجيم 2

ســلاااااااامـ






آآآآآآه غرامي شي اسمه ( بيبسي )

يا جماعة طعمه مع الليمون والثلج عذااااب خاصة بعد وجبة دسمة


(( لعابي يسيل الآن ))


حاليا قاطعته بجميع انواعه واشكاله والوانه حتى الدايت وزيرو سعرااااات .


قاطعته لمدة شهرين فقط




يا ريتني ضعفت ، لأ ..!

آآآآآآه ... ساعات احس بالحنين والشوق اليه..


ساعات اقول من صجي ..!!

ساعات اقول انه ماعندي سالفة وخل ترجع ريما لعادتها القديمة !!




بس العقل يحكمني .... ويقول  :

وتعبج .. وصبرج .. تبينه  يروووووح ..!!






ويعود فيني المنطق من جديد ..



+++++++


والآن سويت غزو من نوع آآآخر ...





ليش مـــا أقطع الشاي ( الأحمر) بالمرى ...؟!

يلا علشان تكمل *_*

حاليا قطعت الشاي لمدة (يومين ) فقط لأني مدمنة شااااااي لحد الجنون :/

يازينه مع الزعفران وماي الورد

آآآآآآآآآآه ياقلبي



++++++++++++++++++++++++++++++






بالنسبة للحلويات والبطاط والكيك ×_×

مستحيل ,,,,,,,وما أقدر لو شنو !!

كل يوم اكلهم تقريبا ..

ريجيم أي كلام مو ...؟

شسوي ...؟؟؟؟؟؟


ادعولي بالهداية والصبر ..


السبت، 5 مارس، 2011

فضفضة ريجيم





اتخذت قرار انقاص الوزن والوصول الى هدفي (الرشاقة)

علشان جذي من فترة الى فترة  راح أكتب عن هذه التجربة ..

آآآآآه .. يلا فضفضة ونقل خبرات عن هذه التجربة

السمنة سببت لي أزمات عاطفية واجتماعية وصحية ونفسية كذلك
خلال سنوات طويلة ..

حان الوقت !

تأخرت أو لا .. المهم اني بديت *_*


طبعا هالكلام قلتها اكثر من مرى .. بس مثل ماقلت لكم في الموضوعات السابقة  عدم الجدية اهي اللي اتخلينا نبتدى من الصفر وتسبب لنا الاحباطات والمشاكل

راح اجرب هالمرة وراح احاول 

 واذا حصلت نتايج ايجابية راح أكتبها أول بأول في المدونة

واذا ماكتبت نتايج عرفوا اني مازلت سمينة @_@

اتمنى لكم الصحة والعافية وتمنوا لي ( النجاح)