الخميس، 17 مارس، 2011

فضفضة ريجيم 3

السلامـــ عليكمــ






آآآآآه من الريجيم وسنينه ..!!

الصراحة  أحس بإنه الارادة حدددددها zero

للحظات ودي أرد نفس الأول ..  كل شي اشتهيته لطيته ..!!


وللحظات اقول .. اذا غلطت راح أبتدي من الأول ........وأنا مافيني أبتدي من الأول ....!!


اشلون بصبر ..؟

الريجيم يبيله صبر وطول بااااااال يبيله ارادة من حديد *_*

اشلون أعلم نفسي الصبر ...؟ اشلون اتحمل هالرجيم مدة طويلة ؟


فكرت انه لازم يكون عندي دافع قوي .. يعني غير الاهداف اللي في بالي

محتاجة نوع من التحدي .. محتاجة نوع من المنافسة ..


يعني شي اتذكره كلما حسيت اني بخربط بالريجيم يمنعني - نوع من المنبه القوي ( جرس تنبيه ذاتي ) كأنه ضمير ويؤنبني!!

ما ادري شنو هالشي ؟



هناك 5 تعليقات:

  1. أول شي شربي مااي وايد

    ابدي يومج اول ما تقعدين من النوم ب قلاص ماي

    و شربيلج على الاقل ١ لتر - لتر و نص باليوم

    اذا اكثر بعد احسن .. و خلييه يكون بالنهار

    لان بالليل ما راح يفييد وايد

    هالشي راح يأثر على رجييمج و يساعدج حييل

    ثاني شي ..

    خلي اهلج و رفيجاتج يسوون لج اهداف

    مثلا شي تبينه .. شي ودج فيه

    خليهم مثلا يقولون لج اذا وصلتي هالوزن نسويلج جذي

    اذا وصلتي هالوزن ننيبلج الشي الفلاني

    جذي بكون طريقة ودج توصلين لها

    و لا تضغطين على نفسج وايد

    اكلي من كل شي و لا تحرمين نفسج ب شي خاطرج فيه

    بس بجرعاات صغيره

    اذا تبين كاكاو اكلي الدارك شوكوليت .. لان مافيه سكر و مواد مضافه وايد

    و بعد قلت لج من قيل الشاي الاخضر ..

    و الاناناس يحرق بعد سعرات حرارية

    لا تنسين بعد التفاح .. التفاحة سعراتها الحرارية بالسالب

    و الافيد الاحمر .. بعدها الاصفر و اخر شي الاخضر

    اتمنى افدتج

    موفقة

    ردحذف
  2. أنا مع كتكوته و أشكرها على المعلومة أول مرة أعرف إنه التفاحة سعراتها الحرارية بالسلب بس كيف ما اعرف بسألها ....

    --------------------

    يا عيون المها نبدأ التحرطيم هههههه ..

    بسألج سؤال؟

    إنتي ليش ما تحبين جسمج؟
    يوم بتحبين جسمج بعدين بيتقبل الجسم وضعج وبيساعدج، أما إذا أهنتيه و إضايقتي منه ما بيساعدج أبدا ..
    لازم تحبين جزء من جسمج حتى لو كان مليان، على الأقل مليان بس مشدود مب مترهل .. صح أو لا ..
    طاعي جسمج و قوليله أحبك لكن بخليك أجمل .. هاي أول طريقة لازم تسوينها قبل إتباع أي نظام غذائي ..

    و أنا أنصح دايما بنظام الإستبدال .. و إختيار السعرات الحرارية الأقل، أو الدهون تكون أقل ..

    الرجيم ما يباله صبر، أصلا لازم تمحين إسم الرجيم من مخج و تقولين أنا الحين بغير نظام حياتي كله من أول ويديييييييد .. و حتى لو غلطت مب مشكلة المهم إني أكمل و حتى لو غلطت هذا درس،و الشهوة دايما تغلب الإنسان، مافيها شي مرة في الإسبوع تكافئين نفسج بكيكة كاكاو، أو بعد إنقاص مثلا 5 كيلو تكافئين نفسج بشي دسم كنت أحب أسوي هالشي واااايد .. وعقب مرور كم من شهر إستويت أحب الأورجانيك و الأشياء الفرش و ما أحب الفاست فود، جسمج ما بيتحمل هالأشياء عقب .. !!

    من مجرب .. و إقري مذكراتي يمكن تلقين فيها تكرار لكن بتفيدج ..
    و أي سؤال نحنا حاضرين

    ردحذف
  3. فيه طريقة مرة سمعتها انج بفترة الريجيم طلعيلج شي يشغلج

    هواية اي شي تقضين فيه وقتج عشان تبعدين عن الخرابيط

    يعني تقدرين تشتغلين بشي من الاشغال اليدوية

    موفقة

    وان شاء الله توصلين لللي تبينه :)

    ردحذف
  4. إن شاء الله قدها :")
    لا تفكرين بانج قاعدة تحرمين نفسج من الأكل, فكري بإنج قاعدة تعطيج نفسج الصورة اللي تتمنانها! ; )

    ردحذف
  5. AM.SA.CHANNEL :
    هذا الموضوع راح يفيدج
    بس اهوا سالب لانه يحرق اكثر من انه يعطي طاقه و جذي
    و هذي فوايده

    http://www.al-batal.com/main/general-sections/2009-05-03-21-46-09/863-2009-12-11-19-10-06.html

    ردحذف